Ubuvanganzo bw'umwimerere nyarwanda

Uhora utuvumbya ku iyo nganzo

Maze abakumva duteze yombi

Tuyicurure nk' inzoga iryoshye

Abatayumva bakabinnyenga

Bareke banjwe batagutoneka.

Singukeza nturi umwami

Ndavuga bigezo sinkoroga

Sintananga intanago iveba

Uwo twanywanye utagira intimba.

Iy' Abagesera si yo waciye

Ntiwanaciye zimwe z'icyanzu

Abenshi banyuramo bububa

Wowe wanyarutse izuba ryaka

Wemye nyamara umutimautimbya.

Uwo wahinze wameze imbagara

Garuka bwangu maze uwubagare

Kuko aho uhinga ugasarura

N' ubwo zaba zitwa amahore

Zimaza umunsi udacya ngo wire.

Uwo wakonze ni ubukonde

Naho abakwatira bagutiza

Bavuza urwamo rwo kwishima

Uwo munyago utagira nyirawo

Umurima utohagiye urawuzi

Kurusha iyo siha yo ku irembo.

Yibuze icyuho ugaruze ibyawe

Usorome izawe uhare iz'abandi

Uragire neza zimwe wagabiwe

Urwuri rwazo urukome ibyonnyi

Uzagororerwa uzanashimwa.

Nyaruka urebe ko utisanga

No mu basenga batasinze

Iyomu Gisope no mu Kabagali

Ahoku Kibuno no muri Safari

Iyo mu Mekebe kwa Mujik

Bateze amasonyura iy' ubusamo

Usange Bihogomaze ihogombe."

Nanjye nti:

" Wimbwira kumira umuriro

Byumve neza si amarenga

Bihogo ukeka ko igihogomba

Yibare uvanamomk' igihombo

Banza uzayibonere amahembe

Kukondagira iziteze neza.

Banza uzayikize Muryamo

Kukokuziramo Ubushita

Bituma inkuyo ntayiha umwete

Sinyishiture nk'inyambo

Kuko itizihiza amahamba

Kandi ikarushya inzira y' ishora.

Rugira wangize imbuto yera

Nk'iriba ritemba ay'urusaro

Rimara inyota iz'indangamirwa

Ntabwo yamparira kuzongwa

Ntagira nk' iyo irimo muzunga

Hato ntazavumwa n' umuzungu

Nzira y' uko ndagira inkungu

Kandi namagana agakungu.

Yireke iminsi izayisunika

Itagira uyikiza umuryasenge

N'intege zarabaye inteja

Maze ubwo izibure mu ntambwe

Isigare igenda amwe y' intamire

Isaba ibisingizo ngo imare umunsi.

Sigaho nihakirwe bumanzi

Mbigire inamahano i Kanani

Gusaba icyororo uwo nkeza

Azampe ishashi ishibutse neza

Izajya irisha ishima ubwatsi

Kandi ishoka aho nashishoje.

Yireke izaheba iby'ubutore

Igere n' aho iryozwa umukamo

Impinga zose ziyiha akamo

Reba neza mu bushyo bundi

Toranya neza mu z' Umuhozi

Zirore zose zirimo Umuhoza

Kandi nziza ibereye ibihozo.

Mbwira wenda ngaruze izayo

Nkore mu rwambari rw' intwaro

Nyakiyabo nyihe umugongo

Amaguru nzayahendahende

Adatuma amaboko agira umurava

Wo guha imbuto umurima utera

Inkiko nitabyara umugaru

Mushushwe n'iyo siha yo hanze

Byose nzabiteme imirizo

Maze incuke nzihe agaciro

Bihogo icyaha nikiyiganza

Ikagira icyusa mu kwigorora

Ntabwo izabura ingororano."

                          MUPENZI  VENUSTE

                       " igitonyanga cy' urukundo

gitera icyizere cy' ubuzima".