Ubuvanganzo bw'umwimerere nyarwanda

Umuntu ni nk'undi

Impuhwe nyinshi n'umutima mwiza,

Umwuka mwiza hagati mu bantu

Twibaze kandi twiyumvishe yuko

Igihe cyose umuntu ni nk'undi

Ureba umuntu mu mpagararo, ye mama we

Mu ngendo ye cyangwa se mu isura

Ahubwo uzajye wibaza yuko,  mama we

Igihe cyose umuntu ni nk'undi

R/ Kuri iyi si hariho ibintu byinshi

Ndetse bishobora kuturangaza

Ariko kandi  si byiza cyane

Ntuzi impamvu uriho n'aho waturutse

Wibaza ubwawe uti ubu nzamera nte? yebaba we

Hirya no hino ntawe ukureba

Ntawe uzajya wishimira uko ukomerewe, yebaba we

Gusa wiringira iyakuremye

Ureba kanaka uko amerewe, disi we

Ibyo bikakubuza gusinzira

Ukumva ushaka icyamukuraho, yebaba we

Nyamara ntacyo bizakumarira.

Umuntu ni nk'undi ni  ko bikwiye, mama we

Twahuriye ino aha twigenda

Bamwe kuri iyi si turi abagenzi, shenge we

Twese turi bene mugabo umwe.

Ukwiye kugira umutima mwiza, yohohoo

Urukundo n'umubano mu bantu

Icyubahiro mbere ya byose, ayiiii

Twubahane mu buzima bw'umuntu

Impuhwe nyishi n'umutima mwiza

N'umwuka mwiza hagati mu bantu

Twibaze kandi twiyumvishe yuko

Igihe cyose umuntu ni nk'undi

Ubuzima bwiza kuri buri we

Mwifulije amahoro menshi cyane

Twese tugere ku majyambere

Dore icyifuzo cya buri muntu, muvandimwe

Amahoro mbere y'ibindi byose

Bityo twubake igihugu cyacu, disi we

Twese tugere ku majyambere

Twese hamwe tugende ku runana

Twunge ubumwe turusheho kujya mbere

Twibaze kandi twiyumvishe yuko

Igihe cyose umuntu ni nk'undi