Ubuvanganzo bw'umwimerere nyarwanda

Hashize imyaka igera kuri itatu Nizeyimana Fidèle

Hashize imyaka yagera kuri itatu

Hari ku mugoroba izuba rirenga

Ni ubwo hashize igihe kirekire

Uwo munsi sinteze kuzawibagirwa

Natemberaga iruhande rw’akagezi

Nari mvuye ku kazi naniwe cyane

Nari maze iminsi ntaruhuka

Umwuka wo mu mujyi wari ugiye kumpitana

Aho hantu nari ndi nari jyenyine

Nerekwa inyoni nziza zaririmbaga

Muri ako kanya mba nikanze umuntu

Nkebutse mbona umukobwa mwiza w’igitego

Uwo mukobwa ambonye agira ubwoba bwinshi

Na njye ndahagarara ndamwitegereza

Ni bwo ntangiye kumusekera

Bwa bwoba yari afite buba burashize

Ntera intambwe eshatu mba mugeze iruhande

Umukobwa aremera turaramukanya

Turatangira turaganira

Hashira amasaha menshi tukiri kumwe

Icyo gihe cyose twamaze turi kumwe

Naje kugeraho numva ndamwikundiye

Mubwira ko muhaye umutima wanjye

Ansubiza ko awakiranye ibyishimo byinshi

Ariko twagombaga gutandukana

Yari agiye kujya gukomeza amashuli

Twazezeranye kudahemukirana

Kugeza igihe tuzongera kubonanira

Namweretse inyenyeri imurika mu ijuru

Mubwira ko igihe cyose azayibona

Azamenye ko mutekereza