Ubuvanganzo bw'umwimerere nyarwanda

SOKO ISUMA ISANGA ISONGA

 
 
Mumpe amito abato b'itoto

Mpake umutaga igicuku kize

Umunsi wiheze ngishyiditse

Jabo ijuru ryijuke ntajunje

Mpanike cyane i Marebe bumve

Mare igishyika nseko iyi iseretse.

Uwa Busimbo aharirwe icyanzu

Mwa Kibanda umwari w'ishya

Iki kivi acyuye ko kirahimbye

Mu kugishuka ashoreye ishimo.  

 
Ubwama bw'uwo mwari w'ishya

Bungana ubwema bw'iryo shimo.

Kuko yavukiye kuba ingenzi

Kandi agatukwa kuba uruyange

Ruzayumba Ubukonya bwose

Bukarusoromaho imbuto z'ishya.

No ku Kiruruma cya Mukungwa

Wa musama wa muvugankuge

Wamutaramiye yoga magazi

Imbizi zisimbiza uwo mugenzi.  

 
Koko yatowe akiri mutoya

Atarama ku Itetero ry'intore

Aba umutambira utaginanwa.

Ategwa amaraba bimugwa neza

Atega amasunzu ayagira inzora

Maze ikinyatsi kiba umusana.

Nuko agimbuka atagimbye

Kandi agenda agegena ingingo

Nyamara akariye ikarishyamenge

Aba itabaza ryota bose.  

 
 
Abanda ivomo i Nkotsi na Bikara

Iry'umusarara rizimya icyaka

Cya wa mukumbi wa Mwimanyi

Wagabiwe itwaza ngo ujye umutwaza

Urumuri n'umukiro bya rubanda.

Nibwo namurabutswe umwari w'ishya!

Agenda akeye acugusa incunda

Ahorana icyeza akura i Cyeya

Agira n'ineza igurutsa ubworo

Ikanoza imanga zuje intuntu. 

 
 
Bene inganzo nimumuhange

Abahete mwese muvune sambwe

Abasamirera muvuge imyato

Abanyamayugi muce umugara

Maze dutaramire uyu mukesha!

Akenyera impumbya agira ihoroshya.

Kandi agira ubutangwa itangwe

Uwo nyagutunga rimuba hino.

Abamusanze abavunya ikobe

Akazira impiza Mpinga y'ishya.  

 
Umushashi ushimye usa na Rugwiro.

Iki kivi wunamutse nyamwari

Ni cyo wateruye ugitoba utwondo

Kuri Buhanga mwa Kibanda

Usamata ubusoro ku kidasesa

Usenda isimbo usera udusindu.

Cyo sayuka ushyika ugira ishyaha

Ishyaka urireshya n'abagukuriye.

Uzira gusumbwa iyo mu masonga

Amwe amasoko asuma asanga.  

 
 
Sangwa yewe uhorana umwishya

Bugacya wishyukana n'intebera.

Urabe imbundo ibumbye ibanga

Ubumbatiye imbuto zitarumba

Warazwe ushaka mwa Kibanda.

Gumya uzisasire umusaya usize

Maze zisume zigana isonga

Rimwe wasanze ugaritse isunzu.

Oroshya nanjye imihigo nyese

Bamenye yuko uvuka i Bwema.  

 
Ogera uri ingabe Nyabahinda!

Ndahe umurangi nze mucurange

Zimwakire induba z'urwoga.

Muzi ahangana n'amahindu

Yajyaga amuhungira ku muhindo.

Muzi abendegera imibande

Ajya kuri Janja ajabuka Kinoko

Yikoma urume rumukoma imbere.

No muri rya joro ry'umutambya

Ntiyatannye hirya iyo mu matongo.

 
Reka bagushagare ucyuye ishya.

Irage urikesha imbyeyi rwema.

Ungana Ntakiyende ya Ntibihezwa

We waguteruje intego ndende

Akaguha uruhare rw'abahererezi

Rwo guhora utanga abandi uruharo.

Rubagabaga uyibagaza intambwe

Ngo ejo udatangwa umwanya i Songa

Umwuma wuriranaga ingira

Uzwi n'ibicuba baguterekaga. 

 
 
Ongera ucuguse incunda cyane

Sugira usangwe n'abagukunda.

Usanzwe ushemerwa n'ingeri nkawe

Zikuzirikana utanabirabukwa

Nubwo inkesha uhora uzicanye

Kandi iwawe hahora inzora.

Kukubyinirira urabiduharire

Maze tukwite akacu kazina

SHYENGO SHYUNGA RYA MASHYEREZO

SOKO ISUMA ISANGA ISONGA. 

 
 
© Mutarama 2007, Karimunda ka Mwemerangoma