Ubuvanganzo bw'umwimerere nyarwanda

Kanyana nkumbura i Kanani

KANYANA NKUMBURA I KANANI


Kanyana nkumbura i Kanani

Keza gatura roho yanjye

Kami kanjye se uracyakoma

Ko udatebuka ngo ufate akayaga

Ko mu mizabibu y' i Kanani ?

 

Hari umunsi nkubura nkababwa

Nkarabirana ibi byo guhwera

Uzi ibisusa uko binogerezwa

Umwuka w' inkono iyo ubihonze

 

Nafata agacucu mu busitani

Nkabona uturabo dusa na roza

Turabya cyane nk' indoro yawe

Nsoroma iteka iyo nakurose

Ngashyira ku mutima ngo ngire ituze

Nkumva ineza intashye mu nda

Ngafata inganzo nagize inkingi

Yo kugutaka nkiri ubukombe

Ngo nzarenguke ngana ubukambwe

Nkugize agasaro kamara isari.

 

Ngaho ngwino hari akazuba

Ka kazuba uzira guhunga

Karasa kakunogereza isura

Rurema yasize yiteguye

Ngo ejo kataguhungiza ugahonga

Ugahungabana nkabura amahoro.

 

Ngaho banguka uwo nashimye

Kuko naguhisemo nshishoje

Nzanira ya ndoro mpora ndota

Urusha bandi kuba urunyonga

Boshye akanyana karora izuba

Ko kuri Nyambo ikamwa ivumera.

 

Ngaho seruka usukirwe impundu

Naho ukunzi njye nshire impumu

Nkurore amatama acira amazi

Ngukore amatako atemba ubuki

Nkubone ikibero cyera urubuto

Rurusha inziza zo mu busitani

Kugira icyanga kimara icyaka.

 

Hari n' ikindi ga urusha abandi

N' uwagenda atabona ahandi

Nka cya gituza ngiramo ituze

Kiremye ku kabiri k' umuteja

Boshye uruhinja ruvutse neza

Mu museke mwiza usa n' amasimbi

Ngaho nsanga nkivunye ihobe

Ugire itetero bibe amateka

Umutima utere ugana mu wawe

Ubuhamya bundi bwava hehe

Ko utagutunze muraga intimba ?

 

Hari na rya josi ry' urwego

Boshye akanyana gafite itetero

Kavutse ku rugero rw' inyambo

Ngo nigasimbuka kansanga

Maze ngasanize imisango

Nti " kukurota mbigize impamba ,

Kandi ntazarira ku Ruyenzi ".

 

Nyaruka cyane nk' umucyo ukeye

Umuteto ugwire uroye amatunda

Y' ubusitani bwa Kanani

Burimo akayaga koza imitima

N' utujwi twiza tw' Abamarayika

Rurema yatoranyije mu beza

Maze bahanika bayitaramira

Nkumva habuzemo akajwi kawe

Wamenyereje unkiza irungu.

 

Gira umurava nkurore iranga

Nshire n' iraba ushyitse ikirambi

No mu mirambi ishashe ya rubaho

Tubeho twembi umudendezo

Iminsi izisunike umusubizo

Ukiri isimbi nkomaho isinde

Ngo ntasuherwa maze gusaza.

 

Sibo y' intore nzakurata

Ndoro y' ububoro nzaguhonga

Mbwira wenda mpanike cyane

Kandi ndenze Nyiramubande

Niba wihishe mu kabande

Itakunyima nkabawa impande

Kandi impinga nyibaza impamvu

Nkumva ntayo iyo iragatabwa.

 

Mbona akanyange nti " dore araje "

Ubwo ryarenga rigana mu bicu

Kagakurikira koga ikirere

Nanjye imutima nti " biri hafi,

Buracya kaza kumara ibicuro ".

 

Ese nzagufate mu kayaga

Gahita kavuza ubuhuha

Mu mizabibu gakiza icyunzwe

Boshye unyongorera ko unshaka

Cyangwa nzagufate mu mubavu

W' utu turabo tw' ubusitani

Niba wihishemo untegereje

Gaho tera ndakwikiriza.

 

Nyaruka wirukane ibyo bicuro

Maze bishonge nk' ibyashobewe

Wowe nkumbura nk' umushongi

Dore ko ubuki uburusha icyanga

Cyezamutima mbishishikare

Njye washimye nkugire icyatwa

No muri byose ngukize ibyonnyi.

 

Mu cyambu cya roho iyi igutaka

Harimo umwanya utavogerwa

Nagize uwawe gira utebuke

Nk' umucyo utambamuye mu cyoko

Sokokwiteke ndagutashya

Nsengo yanjye ni wowe mbwira

Tetero ry' abato ndagutegereje

Tunoze inama iduha umubano

Duhashye umwanzi uduhiga twembi.

 

Indahiro ndahiye nzakurata

Nzagukunda ingoma ibihumbi

Ingobyi yaguhetse nzayihonga

Amagana meza yo mu Nyambo

Maze amarembo atahe amariza

Yo kuri Marebe ntashira irora.

 

                         MUPENZI VENUSTE

                        (Igitonyanga cy'urukundo gitera icyizere cy'ubuzima)

 



21/10/2008
0 Poster un commentaire

A découvrir aussi


Inscrivez-vous au blog

Soyez prévenu par email des prochaines mises à jour

Rejoignez les 436 autres membres